បាល់ទាត់៖ Barcelona បានវាយបកយកឈ្នះ Sevilla ៣គ្រាប់វិញបន្ទាប់ពីបរាជ័យជើងទី១ ពីរគ្រាប់ដើម្បីឡើងវគ្គផ្តាច់ព្រ័ត្រពានរង្វាន់ Copa del Rey។ ការប្រកួតវគ្គពាក់កណ្តាលផ្តាច់ព្រ័ត្រជើងទី២ យប់មិញមានរឿងហេតុជាច្រើនកើតឡើង។
Ousmane Dembele បើកការនាំមុខឲ្យ Barcelona នៅនាទីទី១២ ខណៈការប្រកួតស្ងប់ស្ងាត់គ្មានក្រុមណារកគ្រាប់បាល់បាន។ ឈានចូលវគ្គទី២ Sevilla មានឱកាសស៊ុតបាល់ពិន័យ ១១ម៉ែត្រមួយគ្រាប់តែ Lucas Ocampos ស៊ុតមិនចូលនៅនាទីទី៧៣ មុនពេលដែលពួកគេបាត់បង់កីឡាករម្នាក់នៅនាទីទី៩០+២ នៅពេល Fernando ទទួលបានកាតលឿងទី២ បណ្តេញចេញពីការប្រកួត។ Sevilla នៅតែអាចឡើងវគ្គផ្តាច់ព្រ័ត្របាន ប្រសិនរក្សាលទ្ធផលចាញ់ជើងទី២ នេះ ១–០ តែរឿងមិនគួរឲ្យជឿកាត់ឡើងនៅចុងវគ្គទី២ នៅពេល Gerard Pique រកបានគ្រាប់នាំមុខ ២–០ ឲ្យ Barcelona នៅនាទីទី៩០+៤ ទៅហើយដែលធ្វើឲ្យក្រុមទាំងពីរស្មើគ្នាសរុបទាំងពីរជើង ២–២។
ឈានដល់ម៉ោងបន្ថែម ១៥នាទីពីរដង Barcelona ក៏រកបានគ្រាប់ជ័យជំនះនៅនាទីទី៩៥ ដោយ Martin Braithwaite មុនពេលដែលកីឡាកររបស់ Sevilla, Luuk de Jong ទទួលបានកាតក្រហមទាំងអង្គុយនៅក្រៅទីលាន ក្រោយស្រែកតវ៉ានឹងអាជ្ញាកណ្តាល។ Barcelona នឹងបន្តស្វែងរកពាន Copa del Rey ជាការពន្លាតកំណត់ត្រាឈ្នះជើងឯកលើកទី៣១ ដោយនឹងត្រូវជួបជាមួយ Levante រឺ Athletic Bilbao៕
