តូក្យូ៖ ទីភ្នាក់ងារព័ត៌មាន Reuters បានចុះផ្សាយនៅថ្ងៃទី២៨ ខែធ្នូនេះថា រដ្ឋាភិបាលជប៉ុន បានកែប្រែកាលវិភាគនៃផែនការរុករកទីអវកាសរបស់ខ្លួនកាលពីថ្ងៃអង្គារទី ២៨ ខែធ្នូ ក្នុងគោលបំណងបញ្ជូនជនជាតិជប៉ុនទៅជាន់លើដីឋានព្រះចន្ទនៅចន្លោះឆ្នាំ២០២៥ និងឆ្នាំ២០២៩។

នាយករដ្ឋមន្ត្រីជប៉ុនលោក ហ្វូមីអូ គីហ្ស៊ីដា (Fumio Kishida) បានប្រាប់កិច្ចប្រជុំដើម្បីបញ្ចប់ផែនការថា៖«មិនត្រឹមតែលំហអាកាសជាព្រំដែនដែលផ្តល់ឱ្យមនុស្សនូវក្ដីសង្ឃឹម និងក្ដីសុបិនប៉ុណ្ណោះទេ ប៉ុន្តែវាក៏ផ្តល់នូវមូលដ្ឋានគ្រឹះដ៏សំខាន់ដល់សង្គមសេដ្ឋកិច្ចរបស់យើងផងដែរ ដែលទាក់ទងនឹងសន្តិសុខសេដ្ឋកិច្ចរបស់យើង»។

យោងតាមសេចក្ដីព្រាងកាលវិភាគនៃផែនការ ប្រទេសជប៉ុន មានគោលបំណងបញ្ជូនយាន មិនមែនជាជនជាតិអាមេរិកដំបូងនៅលើព្រះចន្ទ ជាផ្នែកមួយនៃកម្មវិធី Artemis ដែលជាគំនិតផ្ដួចផ្តើម ដឹកនាំដោយសហរដ្ឋអាមេរិក ដែលមានគោលបំណងបញ្ជូនអវកាសយានិកត្រលប់ទៅឋានព្រះចន្ទវិញ។

ផែនការនេះក៏បានបង្ហាញពីក្ដីប្រាថ្នារបស់ប្រទេសជប៉ុនក្នុងការបាញ់បង្ហោះការស៊ើបអង្កេត ដើម្បីរុករកនៅលើភពព្រះអង្គារនៅឆ្នាំ ២០២៤ ក៏ដូចជាការស្វែងរកវិធីបង្កើតថាមពលពន្លឺព្រះអាទិត្យនៅក្នុងលំហផងដែរ។

ស្របពេលដែល ប្រទេសជិតខាងរបស់ជប៉ុនគឺប្រទេសចិន ក៏មានគោលបំណងក្លាយជាមហាអំណាចយានអវកាសនៅឆ្នាំ ២០៣០ ហើយពួកគេក៏មានគម្រោងបញ្ជូនអវកាសយានិកទៅលើព្រះចន្ទផងដែរ ដោយបង្កើនការរំពឹងទុកនៃការប្រណាំងប្រជែងឥទ្ធិពលលើអវកាសនៅអាស៊ី។

កាលពីខែឧសភា ប្រទេសចិនបានក្លាយជាប្រទេសទី ២ ដែលដាក់យានរុករកនៅលើភពអង្គារ ពីរឆ្នាំបន្ទាប់ពីបានចុះចតយានអវកាសដំបូងនៅផ្នែកឆ្ងាយនៃព្រះចន្ទ។

ការប្រកាសរបស់ប្រទេសជប៉ុនអំពីគោលដៅរុករកលើទីអវកាសរបស់ពួកគេកើតឡើងមួយសប្តាហ៍បន្ទាប់ពីមហាសេដ្ឋីជប៉ុនលោក Yusaku Maezawa បានត្រលប់មកផែនដីវិញបន្ទាប់ពីចំណាយពេល ១២ ថ្ងៃនៅលើស្ថានីយអវកាសអន្តរជាតិ (ISS)ដោយក្លាយជា អ្នកទេសចរអវកាសដំបូងគេ ដែលធ្វើដំណើរទៅកាន់ស្ថានីយអវកាសអន្តរជាតិ ក្នុងរយៈពេលជាងមួយទសវត្សរ៍៕

ប្រភព៖ Reuters