សេអ៊ូល៖ ប្រទេសកូរ៉េខាងជើង បានបាញ់សាកល្បង មីស៊ីលផ្លោង ដែលគេសង្ស័យថា បានបាញ់ចេញពីឆ្នេរសមុទ្រភាគខាងកើតរបស់ខ្លួន នៅ ថ្ងៃពុធនេះ ដោយបានគូសបញ្ជាក់ពីការ «ប្តេជ្ញាឆ្នាំថ្មី» របស់មេដឹកនាំ គីម ជុងអ៊ុន ក្នុងការពង្រឹងយោធា ដើម្បីទប់ទល់នឹងស្ថានការណ៍អន្តរជាតិ ។

បើតាមសារព័ត៌មាន Reuters ចេញផ្សាយនៅថ្ងៃពុធ ទី៥ ខែមករា ឆ្នាំ២០២២ បានឲ្យដឹងថា ក្នុងរយៈពេលមួយទសវត្សរ៍ចាប់តាំងពីលោក គីម ជុងអ៊ុន (Kim Jong Un)ឡើងកាន់អំណាចមក ប្រទេសកូរ៉េខាងជើង បានឃើញការរីកចម្រើនយ៉ាងឆាប់រហ័សនៅក្នុងបច្ចេកវិទ្យាយោធារបស់ខ្លួន ប៉ុន្តែក៏ត្រូវបានដាក់ ទណ្ឌកម្មពីអន្តរជាតិផងដែរ។

ការបាញ់សាកល្បងមីស៊ីល ជាដំបូងបង្អស់របស់ប្រទេសដែលមានអាវុធនុយក្លេអ៊ែរនៅឆ្នាំ២០២២ នេះ បានធ្វើឡើង បន្ទាប់ពីការធ្វើតេស្តអាវុធសំខាន់ៗរយៈពេលមួយឆ្នាំ បើទោះបីជា មាន បញ្ហា ផ្នែកសេដ្ឋកិច្ចយ៉ាងធ្ងន់ធ្ងរ ក្នុងអំឡុងពេលនៃការរាតត្បាតនៃមេរោគឆ្លងក៏ដោយ។

យោធាកូរ៉េខាងត្បូងបាននិយាយថា កូរ៉េខាងជើងបានបាញ់អ្វីដែលត្រូវបានសន្មតថាជាមីស៊ីលផ្លោង ឆ្ពោះទៅកាន់សមុទ្រខាងកើតនៃឧបទ្វីបនៅ ព្រឹកថ្ងៃពុធនេះ។ អគ្គសេនាធិការចម្រុះនៅទីក្រុងសេអ៊ូល បាននិយាយនៅក្នុងសេចក្តីថ្លែងការណ៍មួយថា« ការស៊ើបការណ៍សម្ងាត់របស់កូរ៉េខាងត្បូង និងសហរដ្ឋអាមេរិក កំពុងធ្វើការវិភាគយ៉ាងដិតដល់សម្រាប់ព័ត៌មានលម្អិតបន្ថែមទៀត»។

នាយករដ្ឋមន្ត្រីជប៉ុន លោក Fumio Kishida បានពណ៌នាថា វាជា«ការបាញ់មីស៊ីលផ្លោងដែលអាចធ្វើទៅបាន»។

លោកបានប្រាប់អ្នកយកព័ត៌មានថា« វាពិតជាគួរឱ្យសោកស្តាយដែលកូរ៉េខាងជើងបានបាញ់មីស៊ីលជាបន្តបន្ទាប់ ចាប់តាំងពីឆ្នាំមុន»។

គួរបញ្ជាក់ថា ការបាញ់សាកល្បងមីស៊ីល នេះបានធ្វើឡើងតាមសុន្ទរកថារបស់លោក គីម កាលពីសប្តាហ៍មុន ដែលលោកបាននិយាយថា កូរ៉េខាងជើង នឹងបន្តពង្រឹងសមត្ថភាពយោធារបស់ខ្លួន។

កាលពី ឆ្នាំ២០២១ ប្រទេសកូរ៉េខាងជើង បាននិយាយថា ខ្លួនបានសាកល្បងដោយជោគជ័យនូវប្រភេទថ្មីនៃមីស៊ីលផ្លោងបាញ់ពីនាវាមុជទឹក កាំជ្រួចរយៈចម្ងាយឆ្ងាយ មីស៊ីលបាញ់ចេញពី រថភ្លើង និងអ្វីដែលខ្លួនពិពណ៌នាថា ជាក្បាលគ្រាប់ដែលមានល្បឿនលឿនជាងសំឡេង៕

ប្រភព៖ Reuters