អន្តរជាតិ៖ យ៉ាងហោចណាស់មនុស្ស១៣នាក់ រួមទាំងកុមារ៣នាក់ត្រូវបានសម្លាប់ បន្ទាប់ពីយន្តហោះចម្បាំងលឿនជាងសំឡេងមួយបានធ្លាក់ចូលទៅក្នុងអគារលំនៅដ្ឋានមួយនៅក្នុងទីក្រុង Yeysk ភាគខាងត្បូងនៃប្រទេសរុស្ស៊ី នៅជិតព្រំដែនជាមួយប្រទេសអ៊ុយក្រែន បង្កឱ្យមានការផ្ទុះឆាបឆេះ។ នេះបើយោងតាមការចេញផ្សាយដោយសារព័ត៌មាន Al Jazeera នៅថ្ងៃទី១៨ ខែតុលា ឆ្នាំ២០២២។
វីដេអូ នៅលើប្រព័ន្ធផ្សព្វផ្សាយសង្គមបានបង្ហាញពីភ្លើងដ៏ធំមួយបានផ្ទុះឡើងពីអគារប្រាំបួនជាន់កាលពីថ្ងៃចន្ទ ហើយនៅពេលដែលកិច្ចខិតខំប្រឹងប្រែងជួយសង្គ្រោះបានបញ្ចប់ ទីភ្នាក់ងារព័ត៌មាន Interfax បាននិយាយថា សាកសពចំនួន១៣នាក់ត្រូវបានទាញចេញពីអគារបាក់បែក។
យោងតាមក្រសួងស្ថានភាពគ្រាអាសន្នដែលបានដកស្រង់សម្តីដោយទីភ្នាក់ងាររុស្ស៊ីបាននិយាយថា៖ «ក្រុមអ្នកជួយសង្គ្រោះបានបញ្ចប់ការជីករកកម្ទេចថ្ម (...) ជាសរុបមនុស្សចំនួន ១៣ នាក់បានស្លាប់ក្នុងនោះមានកុមារ៣នាក់ ខណៈមនុស្ស ១៩ នាក់បានរងរបួស»។ សេចក្តីថ្លែងការណ៍របស់ក្រសួងបាននិយាយថា៖ «ខណៈពេលធ្វើការហោះហើរហ្វឹកហាត់ពីអាកាសយានដ្ឋានយោធានៃស្រុកយោធាភាគខាងត្បូង យន្តហោះ Su-34 បានធ្លាក់។«មូលហេតុនៃការធ្លាក់យន្តហោះគឺឆេះម៉ាស៊ីនមួយក្នុងពេលហោះឡើង»។
ទីភ្នាក់ងារព័ត៌មាន Interfax របស់រុស្ស៊ី បានដកស្រង់សេវាកម្មសង្គ្រោះបន្ទាន់ដោយនិយាយថា អគារផ្ទះល្វែងចំនួនប្រាំជាន់បានឆេះ ជាន់ខាងលើបានដួលរលំ ហើយផ្ទះល្វែងប្រហែល៤៥ខ្នងបានរងការខូចខាត៕
ប្រភព៖ Al Jazeera
