ទីក្រុងយ៉ាំងហ្គោន៖ ប្រភពមួយបាននិយាយកាលពីថ្ងៃអង្គារ (ទី៩ ខែវិច្ឆិកា) ថា តុលាការរបបយោធាមីយ៉ាន់ម៉ា នឹងប្រកាសសាលក្រមរបស់ខ្លួននៅខែក្រោយ ថា តើមេដឹកនាំដែលត្រូវបានបណ្តេញចេញពីតំណែងលោកស្រី អ៊ុងសាន ស៊ូជី បានបំពានច្បាប់ជំងឺរាតត្បាតក្នុងអំឡុងការបោះឆ្នោត ដែលគណបក្សលោកស្រី បានទទួលជ័យជម្នះកាលពីឆ្នាំមុនដែរឬទេ? ។ នេះបើយោងតាមការចេញផ្សាយដោយសារព័ត៌មាន Channel News Asia នៅល្ងាចថ្ងៃទី០៩ ខែវិច្ឆិកា ឆ្នាំ២០២១។

ប្រទេសមីយ៉ាន់ម៉ា បានស្ថិតក្នុងភាពចលាចល ចាប់តាំងពីរដ្ឋប្រហារខែកុម្ភៈរបស់យោធា ដែលបានបង្កឱ្យមានការតវ៉ាដ៏ធំ និងការបង្ក្រាបយ៉ាងបង្ហូរឈាមលើអ្នកប្រឆាំង។

លោកស្រី អ៊ុងសាន ស៊ូជី អាយុ ៧៦ ឆ្នាំ បានឡើងសវនាការកាលពីខែមិថុនា ហើយប្រឈមមុខនឹងការចោទប្រកាន់ពីការនាំចូល walkie talkies ដោយខុសច្បាប់ ។

គួរបញ្ជាក់ថា ប្រព័ន្ធផ្សព្វផ្សាយត្រូវបានហាមឃាត់មិនឱ្យចូលរួមក្នុងដំណើរការនីតិវិធីនៅតុលាការពិសេសក្នុងរដ្ឋធានី Naypyidaw ហើយថ្មីៗនេះរបបយោធា បាន ហាមឃាត់ក្រុមអ្នកច្បាប់របស់លោកស្រី មិនឱ្យនិយាយជាមួយអ្នកសារព័ត៌មាន។

ប្រភពដដែលបន្ថែមថា នៅថ្ងៃអង្គារនេះ លោកស្រី Aung San Suu Kyi បានបង្ហាញខ្លួន នៅក្នុងសវនាការចុងក្រោយបង្អស់ ក្នុងការកាត់ក្តីពីបទចោទប្រកាន់ថា បានបំពានច្បាប់នៃមេរោគឆ្លងអំឡុងពេលការបោះឆ្នោតឆ្នាំ ២០២០។

ប្រភពបាននិយាយថា លោកស្រីនឹងផ្តល់សក្ខីកម្មនៅក្នុងមេធាវីការពារក្តីរបស់នាងនៅសប្តាហ៍ក្រោយ ដោយបន្ថែម «ដីកាចុងក្រោយដែលប្រកាសសាលក្រមរបស់តុលាការ» ត្រូវបានកំណត់សម្រាប់ថ្ងៃទី១៤ ខែធ្នូ។

លោកស្រី អ៊ុងសាន ស៊ូជី ប្រឈមនឹងការជាប់ពន្ធនាគារ រយៈពេល៣ឆ្នាំ ប្រសិនបើរកឃើញថាមានកំហុស៕

ប្រភព៖ Channel News Asia