សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានក្រើនរម្លឹកឱ្យថ្នាក់ដឹកនាំ ក្រសួង ស្ថាប័ន ចាត់តាំងការងារជូនមន្ត្រីទទួលបន្ទុកការងារនីមួយៗ ឈរលើទិសស្លោក «ចាស់ស្គាល់ផ្លូវ ក្មេងមានកម្លាំង»។
តាមរយៈសារជាសម្លេងនាថ្ងៃទី០៣ខែកញ្ញា សម្តេចមហាបវរធិបតី បានមានប្រសាសន៍ថា យោងលើតម្រូវការចាំបាច់ចំពោះមុខ ដើម្បីធានានិរន្តរភាព និងប្រសិទ្ធភាពការងារ សម្រាប់ដំណើរការងាររបស់ក្រសួងនិងរដ្ឋលេខាធិការដ្ឋានទាំងអស់ ចំណុះឱ្យរាជរដ្ឋាភិបាល សម្តេច សូមដាស់តឿន ឯកឧត្តម លោកជំទាវ រដ្ឋមន្ត្រី ទាំងអស់អំពីកិច្ចការចាំបាច់និងអាទិភាពពាក់ព័ន្ធទៅនឹងការរៀបចំនិងដំណើរការក្រសួងនិងរដ្ឋលេខាធិការដ្ឋាននីមួយៗដោយ យកចិត្តទុកដាក់លើកិច្ចការមួយចំនួនទី១. ចំពោះក្រសួងដែលមិនទាន់ធ្វើការបែងចែកភារកិច្ចច្បាស់លាស់ជូនដល់ថា្នក់ដឹកនាំ ថ្នាក់រដ្ឋលេខាធិការនិងអនុរដ្ឋលេខាធិការ ត្រូវរួសរាន់ធ្វើឱ្យចប់ក្នុងសប្ដាហ៍ក្រោយនេះដើម្បីធានានិរន្តរភាពនិងចីរភាពទាំងលើការដឹកនាំ ទាំងលើការអនុវត្តការងាររបស់ក្រសួងស្ថាប័ន ។
ទី២. ក្នុងការកំណត់ការបែងចែកកំណត់ភារកិច្ច និងការទទទួលខុសត្រូវជូនថ្នាក់ដឹកនាំជារដ្ឋលេខាធិការ អនុរដ្ឋលេខាធិការត្រូវដាច់ខាតធានាឱ្យបាននូវការបែងចែកឱ្យបានច្បាស់លាស់រវាងការដឹកនាំខាងនយោបាយ និងការដឹកនាំខាងបច្ចេកទេសដើម្បីធានាប្រសិទ្ធភាពស្ថាប័ននិងប្រសិទ្ធភាពការងារ ដោយជៀសវាងការលូកដៃក្នុងការដឹកនាំផ្ទាល់លើការងាររបស់អង្គភាពជំនាញ របស់ក្រសួង ស្ថាប័ន ដោយមិនឆ្លងឬដោយរំលងឋានានុក្រមបច្ចេកទេស ប្រសិនបើមានការរៀបចំប្រគល់ភារកិច្ចថ្នាក់ដឹកនាំនយោបាយទទួលបន្ទុកជួយលើការងារបស់រនាយកដ្ឋានដាច់ខាតមិនអនុញ្ញាតឱ្យរំលងថ្នាក់ដឹកនាំបច្ចេកទេសដូចជា ការរំលងឬមិនឆ្លងថ្នាក់ដឹកនាំអគ្គនាយកដ្ឋាន អគ្គលេខាធិកាដ្ឋានបច្ចេកទេសនា ឬ យកដ្ឋាន នោះទេ ត្រូវចាត់ទុកថា ការធានានូវឯកភាពជាតិសាមគ្គីភាព និងសុខដុមរមនីយកម្មការងារនៅក្នុងស្ថាប័នរដ្ឋបាលសាធារណៈដើម្បីលើកម្ពស់ប្រសិទ្ធភាពការងារជាកិច្ចការអាទិភាពដែលយើងត្រូវធ្វើទាំងអស់គ្នា។
ទី៣.ចំពោះមុខត្រូវខិតខំធានាឱ្យបាននិរន្តភាព និងស្ថេរភាពនៃការអនុវត្តការងារនៅក្នុងស្ថាប័នក្នុងករណីចាំបាច់ដែលត្រូវធ្វើវិចារណកម្មមុខងារនៅថ្នាក់បច្ចេកទេសមន្ត្រីឡើងវិញ ត្រូវគិតគូរនូវមូលដ្ឋានចំនួនពីរដែល សម្តេច ធ្លាប់ណែនាំ ត្រូវទី១.គឺគោលការណ៍គុណាធិបតេយ្យ ផ្អែកជាចម្បងលើគុណសម្បត្តិ ស្នាដៃការងារ សមត្ថភាព ចំណេះដឹង ទេពកោសល្យ និងក្រមសីលធម៌វិជ្ជាជីវៈរបស់មន្ត្រីដើម្បីបង្កើនប្រសិទ្ធភាពការងារ។ទី២. គឺគោលការណ៍គុណធម៌ ដើម្បីធានាបានឯកភាព ប្រសិទ្ធភាពផ្ទៃក្នុង ស្ថាប័ន។
ទន្ទឹមនឹងនោះ ថ្នាក់ដឹកនាំស្ថាប័ន ត្រូវរៀបចំយកចិត្តទុកដាក់ប្រគល់ភារកិច្ចមន្ត្រី ដោយផ្អែកលើមូលដ្ឋានការប្រមូលផ្ដុំមន្ត្រីទាំងអស់ជាកម្លាំងសរុបរបស់ស្ថាប័នតាមរយៈការធ្វើសុខដុមរមនីយកម្ម និងការរៀបចំឱ្យមន្ត្រីចាស់ដែលមានបទពិសោធន៍ និងជំនាញនិងមន្ត្រីថ្មីជាកម្លាំងថ្មីបានធ្វើការជាមួយគ្នាតាមទិសស្លោក «ចាស់ស្គាល់ផ្លូវ ក្មេងមានកម្លាំង»។ធ្វើយ៉ាងនេះសំដៅលើកកម្ពស់ស្ថាប័នឱ្យកាន់តែរឹងមាំប្រកបដោយប្រសិទ្ធភាព៕ ប្រភព៖ ក្រសួងព័ត៍មាន
