ខេត្តសៀមរាប ៖ យោងតាមផេកផ្លូវការរបស់ ទូរទស្សន៍ជាតិកម្ពុជា ទទក - TVK បានឲ្យដឹងថា យន្តហោះខ្នាតធំបូអ៊ីង៧៧៧ ហោះត្រង់ពីទីក្រុងស៊ីដនី ប្រទេសអូស្ត្រាលី បានមកចុះចតនៅអាកាសយានដ្ឋានអន្តរជាតិសៀមរាបអង្គរ ជាលើកទី១ នាល្ងាចថ្ងៃទី២៤ ខែវិច្ឆិកា ឆ្នាំ២០២៣ វេលាម៉ោង ៦:៤៤យប់ ដោយដឹកអ្នកដំណើរចំនួន ២០៨នាក់ និងក្រុមអាកាសយានិកចំនួន ១៦នាក់ សរុប ២២៤នាក់ និងត្រៀមហោះចាកចេញពីសៀមរាបវិញនៅថ្ងៃ ២៧ ខែវិច្ឆិកាខាងមុខនេះ។

ឯកឧត្តម ម៉ៅ ហាវណ្ណាល់ រដ្ឋមន្ត្រីនៃរដ្ឋលេខាធិការដ្ឋានអាកាសចរណ៍ស៊ីវិលបានអញ្ជើញមកធ្វើបដិសណ្ឋារកិច្ច និងស្វាគមន៍ភ្ញៀវទេសចរដោយផ្ទាល់នៅអាកាសយានដ្ឋាន ដោយមានការអញ្ជើញចូលរួមពីប្រតិភូផ្នែកអាកាសចរណ៍ និងតំណាងខេត្ត ព្រមទាំងមន្ទីទេសចរណ៍ខេត្តសៀមរាប។

ក្នុងពិធីស្វាគមន៍នោះ ឯកឧត្តម ម៉ៅ ហាវណ្ណាល់ ក៏បានរៀបចំផ្កាកូឡាប១ទង និងកន្សែង១ ជូនភ្ញៀវទេសចរម្នាក់ៗផងដែរ ៕