មហាជនពិតជាបានស្គាល់ហើយ ពីកញ្ញា ឈិន មុន្នីនាថ ដែលត្រូវបានគេស្គាល់យ៉ាងច្បាស់ថាជាកូនស្រីបង្កើតរបស់លោក ឈិន កុសល ។
បច្ចុប្បន្ន កញ្ញា ឈិន មុន្នីនាថ ក៏ជាតារាចម្រៀង និងតារាសម្ដែងស្រីវ័យក្មេង ដែលកំពុងមានភាពល្បីល្បាញខ្លាំងក្នុងសង្គមសិល្បៈខ្មែរ ពិសេសត្រូវបានគេស្គាល់ថាជាមនុស្សពិសេស និងជាម្ចាស់បេះដូង របស់នាយព្រែកផងដែរ ។ ដោយសារតែទេពកោសល្យ និងសមត្ថភាពច្រើនផ្នែកនេះហើយ បានធ្វើឲ្យ កញ្ញា ឈិន មុន្នីនាថ មានមហាជនស្គាល់ច្រើន ។
បើនិយាយពីសម្រស់វិញ កញ្ញា ឈិន មុន្នីនាថ គឺស្អាតបែបធម្មតាហាក់ដូចជាមិនកែកុនអ្វីខុសពី រូបសម្បត្តិពីកំណើតនោះទេ ពោលគឺប្តូរតែសម្បុរតែប៉ុណ្ណោះ បើប្រៀបធៀបនឹងរូបរបស់នាង នៅពីក្មេង ។
ជាក់ស្តែងកាលពីពេលថ្មីៗនេះ លោកឪពុក របស់កញ្ញា ឈិន មុន្នីនាថ បានបង្ហោះរូបភាពកូនស្រីជាច្រើនសន្លឹកនៅលើបណ្តាញសង្គម ដែលជារូបរបស់នាងនៅពីនៅក្មេង ដោយភ្ជាប់ជាមួយសំណេរថា «ឃើញរូបហើយ ចង់តែសើចទេកូនអើយ មានបងប្អូនណាស្គាល់គាត់អត់ទេមើលទៅ » ខណៈកញ្ញា ឈិន មុន្នីនាថ វិញក៏បានស៊ែរ បន្តជាមួយនឹងសំណេរថា «ស៊ែរខ្លួនឯងកុំអោយគេថាយើងមិនទទួលស្គាល់ការពិត» ផងដែរ ៕
