ជុំវិញផ្ទុះ ការរិះគន់ទៅលើគណៈកម្មការ Cambodia idol រដូវកាលទី៤ តារាចម្រៀង លោក ឆន សុវណ្ណរាជ ដែលមិនឲ្យYes ទៅលើបេក្ខជន ទុំរដ្ឋា ហៅ ទុំ សុវត្ថិ ដែលច្រៀងពិរោះតែបែរជាធ្លាក់ទៅវិញ ។

ដោយសារតែការរិះគន់ខ្លាំងពេក គេឃើញតារាចម្រៀង លោក ឆន សុវណ្ណរាជ បានធ្វើការបង្ហោះរូបភាពមួយសន្លឹក អមជាមួយនឹងសំណេរថា « រឿងរ៉ាវព្យុះភ្លៀងសត្វសាហាវយ៉ាងណា ក៏ពូរាជមិនចុះចាញ់ តែមកចេញនឹងក្លិនធុរេននឹងតែម្តង ស្បថ យកពេលវេលាដ៏មានតំលៃរបស់អ្នក មកគិតចេញជាលុយ កុំយកពេលវេលារបស់អ្នកទៅគិតចេញជាសំរាម ព្រោះខួរក្បាលយើងមិនមែនធុងសំរាមនោះទេ »។

ជុំវិញការបង្ហោះនេះ បានធ្វើឲ្យមហាជនរិះគន់កាន់តែខ្លាំង ដោយមហាជនយល់ថា សំណេររបស់តារាចម្រៀង លោក ឆន សុវណ្ណរាជ ដែលបង្ហោះនេះ គែមានខ្លឹមសារស្រដៀងនឹងថាឲ្យអ្នករិះគន់ខ្លួនថាមានខួរក្បាលសំរាម ហើយក្រោយពីបង្ហោះបានប៉ុន្មានម៉ោងមក ដោយសារតែមហាជនផ្ទុះការរិះគន់ខ្លាំងពេក លោកក៏បានលុបចោលវិញ ។ ហើយនៅល្ងាច ថ្ងៃទី២ ខែមិថុនា ឆ្នាំ២០២២ លោក ឆន សុវណ្ណរាជ ក៏បានឡាយវីដេអូ បកស្រាយចំពោះការបង្ហោះនេះផងដែរ ៕