មហាជនពិតជាស្គាល់ហើយ ពីសមត្ថភាពរបស់បេក្ខជន ម្នាក់ ដែលកំពុងប្រឡងកម្មវិធី Cambodia Idol រដូវកាលទី៤ ថុល សុភិទិ ដែលទទួលបានប្រជាប្រិយភាព ខ្លាំងមិនធម្មតា ក្នុងវិញ្ញាសារបន្តបន្ទាប់ ពីមួយសប្តាហ៍ ទៅមួយសប្តាហ៍ កាន់តែខ្លាំងឡើង ។

ក្នុងនោះ អ្វីដែលកាន់តែធ្វើឲ្យ ថុល សុភិទិ កាន់តែល្បីរន្ទឺទាំងកំពុងប្រកួតប្រឡងនៅឡើយនោះ គឺបានស្ទុះហក់កាន់តែខ្លាំង ក្រោយបកស្រាយបទ« មិនអាចឃាត់ទេ » របស់ម្ចាស់បទ គឺលោក ម៉ម ពេជ្ជរិទ្ធ ដែលធ្វើឲ្យអ្នកគាំទ្រ ហ៊ោកញ្ច្រៀវ និងបង្ហោះពេញលើបណ្តាញសង្គម មិនថាទាំងក្នុងTikTok និង Facebook នោះទេ គឺទៅដល់ណា លឺតែបទនេះ ។

ស្រាប់តែថ្មីៗនេះ មានការផ្ទុះឃ្លីបវីដេអូមួយ ជុំវិញការប្រកួត កាលពីថ្ងៃទី៣១ ខែកក្កដា ឆ្នាំ២០២២ ដែលវគ្គLive Show សប្តាហ៍ទី៣ ដែលពេលនោះ បេក្ខជន ថុល សុភិទិ បានជាប់Top 1 តែម្នាក់ ដែលទទួលបានការគាំទ្របោះឆ្នោតច្រើនជាងគេពីសំណាក់មហាជន ហើយពេលប្រកាសលទ្ធផលនោះ ភិទិ បានអរយ៉ាងខ្លាំង និងឱបមិត្តរួមក្រុមជាបន្តបន្ទាប់ ចំណុចដែលមហាជនរិះគន់នោះ បេក្ខជន ពាក់អាវ ពណ៌ស្វាយ ខំលើកដៃចំឱបអបអរសាទរ ភិទិ តែបែរជាភិទិ មិនឱប ហើយរំលងទៅឱបអ្នកផ្សេង ។

ជុំវិញឃ្លីបមួយនេះ ថុល សុភិទិ បានបង្ហោះឆ្លើយតបថា « ខ្ញុំសុំទោសបងប្អូន បើមើលឃើញថា ខ្ញុំខុស ។ Note: ទោះជា បេក្ខជនទាំងអស់ត្រូវប្រលង យកលទ្ធផលរៀងខ្លួន តែពីក្រោយខ្នងពួកខ្ញុំស្រឡាញ់រាប់អានគ្នាណាស់ អរគុណសម្រាប់បងប្អូនដែលយល់ និងនៅតែបន្តស្រឡាញ់គាំទ្រ ៕