សិល្បៈ ៖ យប់មិញនេះ គឺជាការប្រកួតការប្រឡងចម្រៀង Cambodia idol រដូវកាលទី៤ វគ្គផ្តាច់ព្រ័ត ហើយការប្រកួតយប់មិញនេះ បានទាក់ទាញ បណ្តាអ្នកគាំទ្រ រហូតបេក្ខជនទាំង៤រូប សម្រុកការគាំទ្រ ទាំងទៅទស្សនាផ្ទាល់ ទាំងមើលតាមរយៈគេហដ្ឋាន ភ្លូកទឹក ភ្លូកដីតែម្តង ។
ទីបំផុត ក៏បានរកឃើញនូវម្ចាស់ជ័យលាភី គឺ លីម តិច ម៉េង ដែលជាបេក្ខជនមកពីខេត្តកំពង់ចាម និងទទួលបានងារពីអ្នកគាំទ្រថា ជាកំលោះតូចជាងគេ នៅក្នុងក្រុម ។
ក្នុងនោះសូម្បីនៅលើផេកផ្លូវការរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានបង្ហោះនៅវេលាម៉ោង១១ និង៤៦នាទីយប់ ថ្ងៃទី២៨ ខែសីហា ឆ្នាំ២០២២ ទាំងស្រុងថា « សូមអបអរសាទរចៅលីម តិចម៉េង!
ទីបំផុតជោគជ័យត្រូវបានទៅលើអ្នកឈ្នះ។ » ។
សូមបញ្ជាក់ថា ការប្រកួតរដូវកាលនេះ បានធ្វើឲ្យមហាជនពេញចិត្តយ៉ាងខ្លាំង បើទោះបីជា ថុល សុភិទិ ដែលជាបេក្ខជនដ៏ឆ្នើម និងមានសមត្ថភាពខ្លាំងដូចគ្នា មិនបានទទួលពានក៏ដោយ តែ ថុល សុភិទិ បានក្លាយជាតារាចម្រៀងក្នុងចិត្ត មហាជន ស្រាប់ទៅហើយ គ្រាន់តែម្នាក់បានពាន ម្នាក់មិនបានពានតែប៉ុណ្ណោះ តែអ្នកទាំង២ ខ្លាំងដូចគ្នា ។
អ្វីដែលគួរឲ្យចាប់អារម្មណ៍នោះ ក្រោយការប្រកួតចប់ បើសង្កេតមកមើលសកម្មភាពរបស់ ថុល សុភិទិ និង លីម តិចម៉េង ដែលជាមិត្តជិតស្និទ្ធនឹងគ្នានេះវិញ ប្រកួតគឺប្រកួត តែប្រកួតចប់នៅតែជាមិត្តដ៍ល្អ មិនបានអាក់អន់ស្រពន់ចិត្តនឹងគ្នានោះទេ ថែមទាំងជួយអបអរសាទរដល់គ្នាថែមទៀត ហើយវីដេអូមួយ ក្រោយការប្រកួតចប់ គឺ លីម តិចម៉េង ជាម្ចាស់ជ័យលាភី បានបើកកាដូររបស់ម្តាយ ដែលខំវេចតាំងពីខេត្តកំពង់ចាម យកមកឲ្យកូន នោះគឺបាយកញ្ចប់ ខ្ចប់ស្លឹកឈូក ជាមួយនឹងត្រីងៀតមួយកន្ទុយ ដោយលីម តិចម៉េង និង ថុល សុភិទិ បានបើកហើយយកដៃទៅបរិភោគ ដោយក្តីសុខ និងភាពរីករាយ ជាមួយគ្នា ដែលកាន់តែធ្វើឲ្យអ្នកគាំទ្រ កោតសរសើរលើអ្នកទាំង២ ថែមទៀត ពិសេសគឺវីដេអូមួយទៀត ដែល លីម តិចម៉េង ក្រាបសំពះបាតជើងអ្នកមានគុណ នៅមុខបណ្តាអ្នកគាំទ្រ ដែលមានការស៊ែបន្តយ៉ាងច្រើន ដោយម្ចាស់គណនីFacebook ឈ្មោះ Nika Ming បានសរសេរទាំងស្រុងថា «គុណបិតាមាតា វាពិតជាធំធេងណាស់ បងសប្បាយចិត្តដែលមានប្អូនជា អាយដល បងជាអ្នកដ៏ទៃរំភើបប៉ុណ្ណឹង មិនដឹងម្តាយឪពុកប្អូនមានមោទនះភាពចំពោះប្អូនប៉ុណ្ណាទេ សូមរស់នៅជាមួយគុណធម៍ជីវិតបែបនេះរហូតទៅ បងជឿថាអំពើល្អដែលប្អូនបានធ្វើនិងជួយអោយជីវិតរបស់ប្អូនកាន់តែជោគជ័យ ជាចុងក្រោយសូមអបអរសាទរលោកគ្រូសីលធម៍របស់ហ្វេនៗ » ៕សម្តេចតេជោនាយករដ្ឋមន្ត្រី បង្ហោះអបអរសាទរ លីម តិចម៉េង ដែលឈ្នះការប្រកួតពាន Cambodia idol , ខណៈក្រោយប្រកួតចប់ លីម តិចម៉េង ក្រាបសំពះបាតជើងអ្នកមានគុណ នៅចំពោះមុខបណ្តាហ្វេន ដោយក្តីរំភើប
